O alcaldable socialista sospeita que o PP “prefire ser autónomo para contratar a dedo sen dar explicacións”
Luis López Bueno: “Síntome alagado de que o PP vaia a rebufo dos socialistas, anunciando medidas horas despois de que as propoñamos, aínda que nos orzamentos nos lles destinasen un só euro”
A Estrada, 16 de abril de 2019.- O PSdeG de A Estrada, tralas declaracións do edil de Turismo, Óscar Rancaño, pregúntase por que o Concello prefire pagar a un axente de turismo con cartos municipais podendo aproveitar unha subvención da Deputación de Pontevedra.
O alcaldable socialista, Luis López Bueno, sospeita que “o PP prefire ser autónomo para contratar a dedo sen dar explicacións”, e que “por ese motivo dalles igual que os veciños e veciñas teñamos que pagar esa nómina tódolos meses, cando podía saírnos gratis”.
Ante a avalancha de “repentinas promesas claramente improvisadas”, López Bueno asegura sentirse “alagado de que o PP vaia a rebufo dos socialistas, anunciando medidas horas despois de que as propoñamos, aínda que nos orzamentos nos lles destinasen un só euro”.
Nesta liña, o candidato socialista lembra que “xa fomos os primeiros en falar do solo industrial público, e detrás veu o anuncio de que o PP o ía a desenvolver. Xa o prometeran en 2011 e 2015, e seguimos sen telo, como tantas outras cousas”.
