“Consideramos que a organización do goberno é ineficaz e precisa reestruturarse” manifestou López Bueno
A Estrada, 18 de xuño de 2019. O PSOE de A Estrada propón incluír Turismo na concellería de comercio e industria e dotar de entidade propia á igualdade. “Consideramos que a organización do goberno é ineficaz e precisa reestruturarse” manifestou López Bueno. O socialista entende que “é competencia do goberno organizarse, pero que a oposición estamos para facer propostas tamén neste sentido”.
Os socialistas propoñen incluír Turismo na área de Promoción económica, comercio e emprego por razóns lóxicas. “É unha maneira de dotar ao turismo da importancia que ten no desenvolvemento económico do concello. Ademais permitirá axilizar a coordinación de plans estratéxicos e iniciativas con outros motores económicos polo feito de incluír todo nunha mesma concellería”. O voceiro do PSdG – PSOE subliñou que “dende logo, ten máis sentido que unha concellería de Sanidade e Turismo como a actual”.
Respecto da área de igualdade, López Bueno considera que debe “gañar peso dentro da estrutura do goberno”. “Actualmente esta área lévaa Amalia Goldar, e consideramos necesario unha persoa se dedique en exclusiva a fiscalizar a acción de goberno dende a perspectiva da igualdade”. “Podería artellarse como unha colaboración coa área de Servizos Sociais, aínda que o ideal sería unha concellería propia”, valorou López Bueno. “As funcións da nova área irían máis alá das do CIM, permitindo a revisión de todas as políticas municipais”
Os socialistas entenden que “esas funcións deberían ser asumidas unha persoa con capacidade e coñecemento das iniciativas de igualdade, e debera contar con un equipo de traballo”.
A este respecto entenden a dificultade de dotar de persoal a esta nova área, pero indican que a futuro podería ser viable crear un servizo de igualdade completo. López Bueno tamén informou de que as propostas xa foron trasladadas en reunión cos voceiros dos grupos municipais do Pleno.