O líder socialista aposta por acondicionar os actuais e rematar cos “leiraparkings”. Os novos aparcamentos situaríanse na rúa Irida e no entorno da praza do Concello.
O PSOE da Estrada comeza a desvelar propostas de cara ao día 28 de maio. Para comezar intentarán resolver un dos principais problemas que atopan os veciños e veciñas que se achegan ao casco urbano nos seus vehículos para consumir no comercio local.
A aposta do seu candidato, Luis López Bueno, é xerar un modelo de vila onde todas as zonas sexan dinámicas e teñan atractivo económico e social. Contrapuxo este modelo ao do PP, que prioriza a inversión no centro mentres o resto de zonas da vila non reciben “absolutamente nada”.
O líder socialista anunciou que buscará novos terreos no centro da vila para crear dous novos aparcamentos disuasorios “próximos” á zona comercial. Eses dous novos aparcamentos teñen a misión de resolver o principal problema que lle afecta aos veciños e veciñas maiores que se achegan nos seus vehículos á vila, que é a escaseza de aparcamento cómodo.
López Bueno considera que “para persoas máis xóvenes non é un problema aparcar lonxe ou cerca” pero para persoas con mobilidade reducida ou cunha certa idade, “é toda unha odisea facer compras na Estrada”.
Os novos aparcamentos contarían cunhas prazas reservadas que se poderán utilizar cun disco especial para persoas maiores, -do estilo da zona azul-. O candidato socialista ve “fundamental” que os veciños e veciñas das parroquias teñan un entorno “amable” para facer as súas compras ou xestións, e por iso ve nesta proposta “unha resposta eficaz” a un problema que “coñecen ben os nosos maiores”.
Respecto da avenida de Pontevedra, López Bueno valorou que “a construción da rotonda e o cebreado eliminaron decenas de prazas de aparcamento que hai que recuperar axiña”. Ademais recordou que durante este mandato o PSOE incluíu no Plan de Mobilidade Urbana Sostible unha ficha para a construción dun aparcamento para camións que resolva a escaseza de prazas para vehículos grandes. Considera que “esa actuación xa a incluímos nós nun documento técnico, só falla a vontade política do PP”.
Tamén anunciou que acondicionará os aparcamentos existentes chegando a acordo cos propietarios, para que se poidan utilizar “en condicións”. Considera que “seguro que cunha proposta axeitada chegamos a un acordo razoable”. Afirmou que os 133.000 euros que o PP investiu en pantallas “foron cartos tirados ao lixo” e considera que o sistema de conteo de prazas “non o pediu ninguén”. Valorou que eses cartos “estarían moito mellor empregados en resolver os problemas dos aparcamentos, que iso si que o piden os veciños e veciñas”.
