O PSOE DECEPCIONADO POLOS ESCASOS COMPROMISOS DO CONSELLEIRO DE SANIDADE

Luis López Bueno valorou como “pouco rendible” a visita do Conselleiro de Sanidade á
Estrada. Lamenta que non haxa compromisos en Pediatría, Dermatoloxía, Xinecoloxía
ou Uroloxía.
O PSOE da Estrada valorou como “decepcionante” a visita do Conselleiro de Sanidade á
Estrada. Consideran que os compromisos adquiridos por Gómez Caamaño quedan “moi
curtos” para as demandas actuais dos veciños e veciñas da Estrada en materia de
atención sanitaria.
Luis López Bueno lamentou que non transcendera “absolutamente nada” dunha
ampliación de servizos “ambiciosa” no Centro de Saúde da Estrada. O líder socialista
entende que os veciños e veciñas demandan da Xunta “moitos máis servizos” no centro
de saúde como son unidades de Dermatoloxía, Xinecoloxía e Uroloxía, e a ampliación do
servizo de Pediatría cun turno de tarde. “Desgraciadamente, non houbo ningunha
declaración sobre estas posibilidades”.
O voceiro socialista entende que o estado de saturación dos diferentes servizos nos
Hospitais de Santiago de Compostela cáusanlle un perxuízo aos veciños e veciñas da
Estrada que se deben desprazar á capital para acudir ás consultas, polo que “a nosa
aposta é reforzar a atención no Centro de saúde da Estrada” e así evitar
“desprazamentos, preocupacións e esperas para os pacientes”.
Avanzou que dende o PSOE local traballarán nese sentido porque “temos grandes
profesionais da sanidade na Estrada” e chamou ao goberno local a “non conformarse”
porque “un concello como A Estrada merece máis servizos e unha aposta ambiciosa polo
Centro de Saúde”.
Sobre o anuncio do programa de diálese, López Bueno considera que “é a única boa
nova que saíu da xuntanza” pero aclara que “a iniciativa ten que ser apreciada polos
pacientes, se non será un esforzo sen recompensa”.