Román Suárez explica que A Estrada ten agora mesmo 3.962 vivendas baleiras, o dobre que hai 10 anos (2.050). Reclama un enfoque distinto da política urbanística da Estrada, “hai que priorizar a rehabilitación, xa temos un parque de vivenda moi amplo”.
O PSOE da Estrada analizou os datos que este mesmo ano publicou o Censo de Vivendas Baleiras do Observatorio da Vivenda de Galicia. Román Suárez calificou de “alarmante” o incremento de vivendas baleiras na Estrada, que pasou de 2.050 no ano 2011 a 3.962 no ano 2021. Explicou que vivenda baleira é aquela que non é nin primeira nin segunda
residencia de ninguén.
Para o voceiro de urbanismo do Grupo Municipal Socialista estes datos demostran que “A Estrada é un concello en clara regresión” e demostra o “fracaso absoluto” do PXOM aprobado polo PP.
Suárez considera que “está demostrado que non era a ferramenta de futuro que necesitaba A Estrada” e referiuse aos datos que figuran no propio plan, que prevía 4.500 novas vivendas e un aumento de 6.800 veciños e veciñas no período 2013-2025. “Desgraciadamente, estamos vendo como todo iso era unha fantasía do PP” apuntou.
O concelleiro explicou que o PP non fai política de vivenda “nin pública nin privada” e instou ao goberno local a “tomar medidas” para que o mercado inmobiliario da Estrada “volva ser dinámico”. Román Suárez ten claro que nos vindeiros anos haberá menos promoción privada nos concellos de mediano tamaño, e por iso considera que “a alternativa máis intelixente é priorizar a reforma do parque de vivendas que xa temos”.
No último Pleno municipal Luis López Bueno reflexionou sobre a posición actual da Estrada no conxunto de Galicia. O líder socialista apuntou a que “A Estrada está diante dunha oportunidade histórica” polos altos prezos da vivenda en Santiago de Compostela. “A vivenda nova en Santiago está en 350.000 a 400.000 euros, é imposible de adquirir para rendas de familias traballadoras” apuntou.
Pediulle a toda a corporación que “temos que ser capaces de convencer á xente de que A Estrada somos un candidato moi serio para desenvolver proxectos de vida nela” e advertiu de que “é a primeira vez na historia que podemos aproveitar o feito de ser área metropolitana de Santiago de Compostela”.
Tamén recordou que o PP da Estrada nin sequera solicitou a subvención de 50.000 euros por vivenda que outorgaban os fondos europeos para construción de vivenda de alugueiro social. Ademais explicou que a Xuntaimpediu que os concellos de máis de 20.000 habitantes rehabilitaran vivenda existente coa mesma subvención, demostrando un
“descoñecemento absoluto das necesidades dos Concellos”.
